editionmevinapuorger, 2022
«be cun rispli» raquinta da l’umilitad dal pled, da la fragilitad e passageritad. La collecziun da poesias inspira vias da l’enconuschent al misterius, vul restar liber per midar e svanir, envida a ponderar a fund il pled che as manifestescha en maniera decenta ed accessibla. «be cun rispli» è resun da la vita vesida, da vita vivida, temida, retegnida, reflectada ed era patida. La poesia da Jachen Andry è tessida cun precisiun e premura. Il ritem e la sonoritad da ses rumantsch la rendan tut atgna.
Aus: Jachen Andry. be cun rispli. editionmevinapuorger, 2022
sch’eu tgness
la bratscha
clos
cunter meis corp
e sch’eu schmachess
ils puogns
cun tuotta forza
cunter las forzas
dal terratsch
rivessa
da’m dozar
quel zich chi voul
per flottar
suspais i’l ajer
bod sco svolar
be plü discret
ma eu nu fetsch
eu sun
immez cumün
eu sa
però
chi va –
eu n’ha sömgià
